Risastór dagur á morgun í GKG – Annika kemur í heimsókn!

Home/Fréttir/Fréttir almennt/Risastór dagur á morgun í GKG – Annika kemur í heimsókn!

Risastór dagur á morgun í GKG – Annika kemur í heimsókn!

Stelpugolfdagurinn 2018 fer fram sunnudaginn 10. júní milli kl. 14:00 og 17:00 á æfingasvæði Golfklúbbs Kópavogs og Garðabæjar líkt og undanfarin ár.

PGA á Íslandi og Golfsamband Íslands halda uppteknum hætti en í ár mun tífaldur risameistari og einn sigursælasti kylfingur heims, Annika Sörenstam frá Svíþjóð, halda sýnikennslu í Stelpugolfi. 

Sýnikennslan fer fram kl. 14-15 á 9. teig í Mýrinni þar sem hún mun slá og lýsa því sem hún er gera. Hún slær inn á 9. flöt og niður 8. brautina. Því mun leikur raskast hjá þeim sem eru að koma að 8. brautinni á þessum tíma. Ræsir verður til staðar og leiðbeinir fólki.

„Við erum sérstaklega spennt fyrir Stelpugolfi í ár enda ekki oft sem Íslendingum gefst kostur á að fá golfkennslu frá einum allra besta kylfingi sögunnar. Við hvetjum alla áhugasama að taka þátt í þessum skemmtilega degi með okkur,” segir Ólafur Björn Loftsson, framkvæmdastjóri PGA á Íslandi.

Markmið viðburðarins er að auka þátttöku kvenkylfinga á öllum aldri og auka fjölskylduímynd golfíþróttarinnar. Þó eru að sjálfsögðu allir af báðum kynjum velkomnir á Stelpugolf. Gestir sem mæta fá tækifæri til að fara í gegnum mismunandi stöðvar á æfingasvæði GKG þar sem PGA golfkennarar verða til staðar að leiðbeina. Boðið verður upp á skemmtilegar þrautir og leiki ásamt kennslu í hinum ýmsu þáttum leiksins. Kylfur verða á staðnum fyrir þá sem vantar, það er engin nauðsyn að vera allan tímann og vel mögulegt að koma í styttri tíma sem og lengri.

Stelpugolfdagurinn er samvinnuverkefni PGA á Íslandi, GSÍ, GKG, Icelandair Cargo, ÍSAM og  Vodafone.

  • Stelpugolf er einn stærsti viðburður ársins í golfhreyfingunni.  Það má því búast við metfjölda sunnudaginn 10. júní í GKG – þar sem, Annika Sörenstam, ein stærsta íþróttastjarna allra tíma mun mæta á svæðið.
  • Viðburðurinn fer fram hjá Golfklúbbi Kópavogs og Garðabæjar. Hann er opinn öllum og ókeypis. Við biðlum til ykkar að aðstoða okkur við að láta fólk vita af Stelpugolfi í aðdraganda viðburðarins sem og að mæta á sunnudaginn og verða vitni að einstökum degi.

By |09.06.2018|