Kæru GKG félagar.
Gleðilegt ár og takk fyrir það gamla!
Framundan er val á Íþróttakarli og Íþróttakonu Garðabæjar og Kópavogs. Tilnefningar GKG til beggja bæjarfélaga eru þau Ragnar Már Garðarsson og Ingunn Gunnarsdóttir. Hér fyrir neðan má sjá ágrip af árangri þeirra á síðastliðnu tímabili.
Í Garðabæ verður um netkosningu að ræða, en verðlaunahátíðin sjálf fram í sal FG sunnudaginn 13. janúar kl. 13:00. Eins og segir í tilkynningu frá Garðabæ þá fer val á íþróttakarli og íþróttakonu Garðabæjar fram með opinni vefkosningu eins og síðustu tvö ár á íbúagátt Garðabæjar í fyrstu viku nýs árs. Atkvæði í þeirri kosningu vega jafnt á móti kosningu innan Íþrótta- og tómstundaráðs Garðabæjar.
Við hvetjum GKG félaga til að taka þátt í vefkosningunni og kjósa okkar félaga Ragnar Má og Ingunni. Smellið hér til að kjósa.
Ragnar Már Garðarsson
Ragnar Már Garðarsson hefur stundað golf síðan um 4 ára aldur. Hann æfir 5-7 daga vikunnar.
Ragnar Már átti stórkostlegt tímabil þar sem óhætt er að segja að hann hafi tekið stórt stökk og sett leik sinn á hærra plan á þessu ári. Í september s.l. gerði hann sér lítið fyrir og sigraði á Duke of York mótinu, sem haldið var á Royal Troon vellinum í Skotlandi en einungis landsmeisturum 17-18 ára er boðið til leiks. Því má segja að þetta sé eitt sterkasta U18 mótið í heiminum. Ragnar var valinn Efnilegasti kylfingurinn af Afreksnefnd GSÍ og kylfingur ársins hjá GKG.
Ragnar Már er í A landsliðshópi GSÍ og keppti með unglingalandsliði Íslands í undankeppni EM landsliða í Búlgaríu. Ragnar leiddi mótið eftir fyrsta hring þegar hann lék á 67 höggum.
Ragnar Már er frábær fyrirmynd annarra yngri sem eldri kylfinga, reglusamur, vinnusamur og ávallt jákvæður. Hann er afar ljúfur drengur en með mikla keppnishörku. Ragnar Már hefur sýnt mikla íþróttahæfileika en hann er einnig í unglingalandsliðinu í blaki. Þetta tímabil hefur verið ævintýri líkast og lækkaði forgjöfin úr 3,4 í 0, sem eru ótrúlegar framfarir. Það er ekki á hverjum degi sem íslenskur íþróttamaður sigrar á móti erlendis og opnar þetta honum dyr í sterk boðsmót, en Ragnar mun t.a.m. keppa á mjög virtu móti í Flórída milli jóla og nýárs. Ragnar mun einnig fá tækifæri til að verja titil sinn á Duke of York mótinu, sem er fátítt, en yfirleitt hafa sigurvegarnir verið á 18 ári. Hans bíða önnur landsliðsverkefni næsta tímabil en Ragnar er án efa einn af okkar framtíðarkylfingum.
Ingunn Gunnarsdóttir
Ingunn hefur verið í fararbroddi annarra kvenkylfinga í GKG undanfarin ár. Hún hefur stundað golf frá því um 10 ára aldur og æfir nú 5-7 daga vikunnar. Ingunn er í landsliðshópi GSÍ og stundar nú nám við Furman háskólann í Bandaríkjunum og keppir samhliða námi með sterku liði skólans.
Ingunn er öðrum kylfingum frábær fyrirmynd þar sem hún sýnir mikinn dugnað við æfingar og baráttuvilja í keppnum. Hún tekur þátt í uppbyggingarstarfi GKG sem leiðbeinandi í sérstöku stúlknaátaki og nær mjög vel til stúlknanna, sem líta mikið upp til hennar.
Helsti árangur Ingunnar er 2. sæti í Meistaramóti GKG í júlí, 3. sæti Sveitakeppni GSÍ með A sveit kvenna (Íslandsmót félagsliða) á Akranesi í ágúst, 3. sæti á Íslandsmóti í holukeppni hjá GKG í júní, 6. sæti á Eimskipsmótaröð kvenna sem fram fór í Keflavík í maí, 8. sæti á Eimskipsmótaröð kvenna sem fram fór á Kiðjabergi í ágúst og 7. sæti á stigalista Eimskipsmótaraðar kvenna.
Aðrar viðurkenningar vegna Garðabæjar:
Framúrskarandi árangur – Íslandsmeistaratitlar
Einstaklingar
María Málfríður Guðnadóttir Öldungaflokkur 50+
Ragnar Már Garðarsson Unglingaflokkur 17-18 ára
Gunnhildur Kristjánsdóttir Unglingaflokkur 15-16 ára
Sveit 16-18 ára pilta
Aron Snær Júlíusson
Daníel Hilmarsson
Egill Ragnar Gunnarsson
Emil Þór Ragnarsson
Ragnar Már Garðarsson
Sverrir Ólafur Torfason
A-sveit Mfl. karla
Alfreð Kristinsson
Ari Magnússon
Birgir Leifur Hafþórsson
Guðjón Henning Hilmarsson
Kjartan Dór Kjartansson
Ottó Sigurðsson
Ragnar Már Garðarsson
Sigmundur E. Másson
Landsliðsþátttaka
Guðjón Henning Hilmarsson Karlalandslið
Aron Snær Júlíusson Unglingalandslið
Egill Ragnar Gunnarsson Unglingalandslið
Gunnhildur Kristjánsdóttir Unglingalandslið
Særós Eva Óskarsdóttir Unglingalandslið
Ragnar Már Garðarsson Unglingalandslið
Emil Þór Ragnarsson Unglingalandslið
María Málfríður Guðnadóttir Öldungalandslið
Efnilegasti íþróttamaðurinn
Velja skal einn pilt og eina stúlku í hverri íþróttagrein sem ekki hefur hlotið nafnbótina áður
Bragi Aðalssteinsson
Elísabet Ágústsdóttir
Almenningsíþróttir
Tilnefna skal tvo einstaklinga, karl og konu, sem ekki hefur hlotið viðurkenninguna áður
Gunnar Páll Þórisson
Gullveig Sæmundsdóttir
Heilsurækt eldri borgara – 70 ára og eldri
Fríður Guðmundsdóttir
Steinar J. Lúðvíksson
Viðurkenning vegna framlags til félagsmála
Tilnefna einn skal einstakling sem ekki hefur hlotið viðurkenninguna áður
Gunnlaugur Sigurðsson
Tilnefningar vegna Kópavogs
Íþróttahátíð Kópavogs fer fram í salnum kl. 17 þann 8. janúar
Íþróttakarl Kópavogs 17 ára og eldri
Ragnar Már Garðarsson
Íþróttakona Kópavogs 17 ára og eldri
Ingunn Gunnarsdóttir
Íþróttakarl Kópavogs 13-16 ára
Aron Snær Júlíusson
Íþróttakona Kópavogs 13-16 ára
Gunnhildur Kristjánsdóttir
Viðurkenningar vegna Íslandsmeistaratitla. Sömu og hér fyrir ofan vegna Garðabæjar.
Allir aðilar sem eru tilnefndir og/eða eiga von á viðurkenningum eru vinsamlegast beðnir um að mæta á tilskyldum tíma til að taka við sínum viðurkenningum.
Síðastliðið ár var einstaklega gott hjá afrekskylfingum GKG. Góður stígandi hefur verið undanfarin ár og við stefnum ótrauð áfram á frábæran árangur í mótaröðunum.
Bestu kveðjur,
Úlfar Jónsson
Íþróttastjóri GKG