GKG-ingar eru einstaklega öflugir í sjálfboðaliðastarfi klúbbsins sem skartar til dæmis frábæru öldungastarfi. Ein af sprautunum í því starfi er Elísabet Þórdís Harðardóttir, fædd á því herrans ári 1953 og á því stórafmæli á þessu ári. Svo gustar heldur betur dásamlega af þessum meistara í undirleiknum á píanóinu eða nikkunni þegar GKG-ingar gera sér dagamun og eins þegar hún setur sig í golfjógastellingar með félögum sínum. Elísabet Þórdís býr í Garðabæ, er með 25,4 í forgjöf í dag og eitt af hennar stóru afrekum er hola í höggi, sem hún afrekaði löngu á undan karlinum sínum, honum Einari Tómassyni. Það var líka löngu áður en yfir hana rigndi heillaóskum út af erninum á fyrstu braut á Leirdalnum en meira um það hér á eftir ? Innilega til hamingju með stórafmælis áfangann Elísabet Þórdís og megirðu eiga frábært stórafmælis golfsumar!

Hvað dró þig að golfinu og hvenær?

Það var í kringum árið 2000 þegar ég fór að elta kallinn á golfvöllinn.

 

Hvers vegna valdirðu GKG og hvort er Mýrin eða Leirdalur þinn völlur? 

Klúbburinn er í næsta nágrenni við heimilið og því lá það beinast við að ganga í GKG.  Mér finnst báðir vellirnir góðir, en spila þó meira Mýrina.

 

Hvert er uppáhalds leikformið þitt, hver er uppáhaldskylfan þín og áttu þér fyrirmynd í golfinu?

Texas scramble er uppáhalds leikformið og uppáhaldskylfan er 6 hybrid, hana nota ég mest á brautum. Fyrirmyndin er Tiger Woods.

 

Hvað er það skemmtilegasta sem þú hefur lent í á golfferlinum?

Fór holu í höggi, langt á undan kallinum.  Þetta var á 2. braut í Borgarnesi árið 2009.

 

En það vandræðalegasta?

Það var þegar ég gleymdi að fara yfir skorkortið eftir hring á Leirdalnum. Þetta gerðist eftir að nýbyrjað var að skrá skorið í síma.  Ég skildi ekkert í því að yfir mig rigndi hamingjuóskum með örninn á 1. braut.  Þetta var mjög vandræðalegt.

 

Uppáhalds holan þín á Leirdalnum?

Ellefta brautin, par 3, er mín uppáhaldsbraut.  Þar hef ég oft náð góðu spili.

 

Uppáhalds holan þín á Mýrinni?

Það er þriðja brautin, par 4.

 

Hvert er drauma GKG hollið þitt og hvaða utanfélagsmaður fengi að vera með í hollinu? 

Í draumahollinu eru allir synir mínir en þeir eru Hörður og Einar Ólafur sem eru að sjálfsögðu báðir í GKG og steinsmiðurinn Tómas sem er ekki í klúbb.

 

Hver er uppáhaldsvöllurinn fyrir utan GKG? 

Skeggjabrekka á Ólafsfirði og völlurinn á Húsavík.

 

Hver er upplifun þín af golfhermum GKG?

“Skellurnar” mæta saman í golfhermana einu sinni í viku, upplifunin er mjög góð og skilar sér í bættum árangri.

 

Hvernig var síðasta golfsumar hjá þér og hvernig leist þér á GKG vellina það sumarið?

Golfsumarið var mjög gott, við “Skellurnar”(sem er félagsskapur heldri kvenna) tókum þátt í liðakeppni o.fl. sem var mjög gaman og áhugavert. Vellirnir eru fínir og eru alltaf að batna. Ég er sérstaklega hrifin af breytingunni á 16. braut á Leirdalnum.

 

Ætlarðu að vera með í Meistaramóti GKG í sumar og ef svo, hverjar eru væntingarnar fyrir mótið og áttu einhver leynitrix fyrir okkur hin? 

Ég stefni á að taka þátt í Meistaramótinu næsta sumar og ætla mér stóra hluti.  Leynitrixið er nú bara að njóta og hafa gaman.

 

Ertu með einhver önnur plön og væntingar inn í golfsumarið framundan?

Ég stefni á að vera duglegri að æfa, væntingarnar snúa að því að vera betri í dag en ég var í gær.

 

Uppáhaldsnestið í golfpokanum?

Vatn og banani.

 

Hvað er helst um að vera hjá öldunganefnd GKG í sumar?

Dagskráin hefur ekki verið opinberuð þegar þetta er skrifað en ég get sagt að það verða mót í hverjum mánuði, heima og í öðrum klúbbum.

 

Hvað er lang, lang best við GKG? 

Skemmtilegir klúbbfélagar, gott viðmót og fallegt umhverfi.