Frá vallarstjóra – ágúst 2026

Tímabilið hefur verið langt hingað til og hefur svo sannarlega reynt á seiglu vallarins og vallarteymisins. Ég gæti hafa verið aðeins of fljót á mér í byrjun sumars að lýsa ánægju minni með ástand vallarins eftir veturinn. Þótt völlurinn í heild hafi sloppið við sérstaklega erfiða vorbyrjun gerðu flatirnar það sannarlega ekki.

Ég man ekki eftir öðru tímabili þar sem ég hef yfirsáð flatirnar jafn oft og við höfum gert í ár. Álagið sem þær hafa orðið fyrir, bæði vegna veðurs og leiks, hefur verið umtalsvert. Endurheimt grass á Íslandi er krefjandi við bestu aðstæður, sérstaklega þegar leiknir eru fleiri en 250 golfhringir á dag. Slíkt leikálag eykur enn á vandann þegar grasið er viðkvæmt eða skemmt.

Veðrið hefur aukið enn á erfiðleikana. Við höfum upplifað löng tímabil með úrhellisrigningu, flóðum og vatnsósa svæðum sem liggja lágt í landinu. Á öðrum köflum hafa björt sól og vindur þurrkað brautirnar og valdið grasinu enn frekara álagi.

Ég vil færa öllu vallarteyminu innilegar þakkir fyrir vinnuna við endurheimt vallanna í sumar. Hver einasti meðlimur teymisins hefur lagt sitt af mörkum við umfangsmikla sáningu og ýmis önnur verk við endurheimt grassins.

Endurheimt flatanna …

Til að koma flötunum aftur í gott ástand höfum við blandað saman diskasáningu, doppusáningu, handsáningu, reglulegri sanddreifingu, mottun og markvissri áburðargjöf á svæðum sem hafa orðið fyrir álagi. Endurheimt í þessu umfangi krefst bæði mikils tíma og vinnuafls og staðfesta teymisins við að fylgja áætluninni eftir hefur verið framúrskarandi.

Vikuleg sanddreifing á flötunum er mikilvægur hluti af verklagi okkar. Þótt kylfingum sé ekki alltaf skemmt við að sjá sand á golfkúlunum er hann nauðsynlegur til að viðhalda gæðum yfirborðsins, bæta endurheimt og stuðla að heilbrigðari vaxtarskilyrðum.

Ekki má heldur vanmeta þá vinnu sem þarf til að gera flatirnar tilbúnar fyrir leik á hverjum morgni. Eftir sanddreifingu undirbýr teymið flatirnar vandlega og hreinsar þær, meðal annars með sópun og blæstri að lokinni völtun og slætti, áður en leikur hefst. Að halda þessari vinnu gangandi og sinna jafnframt daglegum verkefnum krefst mikillar samhæfingar og þolinmæði hjá sumarstarfsfólkinu okkar.

Ég vil einnig þakka kylfingum okkar fyrir þann skilning sem þeir hafa sýnt meðan þessi vinna hefur staðið yfir.

… með nýsköpun að leiðarljósi

Eins og margir hafa eflaust tekið eftir hef ég undanfarnar vikur prófað nýjar aðferðir við endurheimt og uppbyggingu grass á þeim flötum sem verst hafa orðið úti. Helsta áskorun okkar í sumar hefur ekki endilega verið spírunin sjálf. Hefðbundnar sáningaraðferðir hafa skilað góðri spírun en ungplönturnar eru afar viðkvæmar fyrir uppþornun og álagi frá umferð þar til þær hafa myndað nægilega öflugt rótarkerfi, sprota og hliðarvöxt. Af þeim sökum hefur grasið ítrekað spírað án þess að ná að festa sig nægilega vel í sessi.

Sanddreifing hefur hjálpað til við að jafna yfirborðið og bæta snertingu fræjanna við jarðveginn. Hún getur þó einnig valdið vandkvæðum í daglegum rekstri, sérstaklega þegar sandur og annað efni safnast í sláttuvélar og á valtara. Best væri að vinna þessi verk við þurrar aðstæður en þar sem leikið er á vellinum frá morgni og fram yfir miðnætti er það ekki alltaf raunhæft.

Á sama tíma þarf áfram að sinna þeim hlutum flatanna þar sem gróðurþekjan er góð með reglulegum slætti, völtun, vökvun og yfirsáningu. Við þurfum því að þróa aðferðir við endurheimt sem geta gengið samhliða daglegri umhirðu í stað þess að byggjast á því að hægt sé að verja viðkomandi svæði alfarið fyrir umferð.

Í sumar höfum við gert tilraunir með nokkrar mismunandi aðferðir. Á flötum 7 og 8 í Leirdal og á æfingaflötinni voru svæði götuð með handverkfærum og sáð í þau blöndu af língresi (l. agrostis) og vingli (l. festuca). Að því loknu var dreift yfir þau þunnu lagi af sandi.

Á flötum 7 og 8 voru sambærileg svæði götuð og síðan vatnssáð með língresi og vingli í næringarbættri sáningarblöndu. Trefjamassinn í blöndunni hjálpar til við að halda raka að fræjunum, verja þau og binda sáningarefnið við yfirborðið. Þessa aðferð höfum við venjulega notað á stærri bökkum og í brekkum þar sem erfitt er að halda fræjum úr hefðbundinni sáningu á sínum stað.

Á flöt 7 var einnig prófuð aðferð þar sem svæðið var gatað og sáð í það vingli og língresi. Sveppamoltu var blandað í yfirborðslagið og viðbótarnæring borin á auk vökvunar með vökvunarkerfinu. Að lokum var svæðið hulið til að viðhalda raka meðan grasið var að festa rætur.

Þessar tilraunir hafa þegar skilað okkur margvíslegri og gagnlegri reynslu. Meginniðurstaðan er sú að spírunin er aðeins fyrsta skrefið. Árangursrík endurheimt ræðst af því hvort okkur tekst að koma ungu plöntunum í gegnum viðkvæmt uppvaxtarskeið og byggja upp nægilega þétta grasþekju, öflugan rótarmassa og hliðarvöxt svo grasið þoli þær kröfur sem gerðar eru til flata.

Ég mun birta frekari niðurstöður og ljósmyndir frá þessum tilraunum í næsta fréttabréfi. Ýmislegt lofar góðu en allar aðferðirnar þarfnast frekari aðlögunar og þróunar áður en þær geta skilað okkur árangri til lengri tíma.

Við munum ef til vill aldrei geta komið alfarið í veg fyrir vetrarskemmdir en við getum haldið áfram að bæta aðferðir okkar og flýta fyrir endurheimt þegar þær verða.

Um allan völlinn

Þótt flatirnar hafi krafist mikillar athygli hafa önnur svæði vallarins áfram fengið markvissa umhirðu. Sú vinna nær allt frá frágangi glompukanta, mótun glompna, vikulegri tilfærslu sands, hreinsun steina og illgresis og reglulegri hrífun til viðhalds á sláttuskilum, viðgerða á brautum og endurheimtar svæða í kringum flatir. Markmiðið er að skapa jafnara yfirborð og bæta leikgæði bæði í karganum og á snöggslegnum svæðum umhverfis flatirnar.

Sumir kylfingar hafa ef til vill einnig tekið eftir breytingum í kringum Leirdalsflatirnar. Við nýttum tækifærið undir lok tímabilsins til að móta þessi svæði upp á nýtt og færa glompur og dældir betur inn í leikinn. Með tímanum munum við halda áfram að fínstilla svæðin með sanddreifingu og reglulegum slætti og bæta þannig útlit þeirra, yfirborð og leikgæði.

Sérstakar þakkir fær teigateymið okkar undir stjórn Randvers. Nákvæm og vandvirk vinnubrögð hans setja viðmið fyrir teymið. Hann tryggir að teymið standist þær kröfur sem gerðar eru við morgunundirbúning og hefur í sumar gegnt stóru hlutverki í þjálfun sumarstarfsfólks.

Dagleg vinna við teigana fer oft fram hjá fólki en hún er umfangsmikil: viðgerðir á kylfuförum og torfusárum, færsla teigmerkja, viðgerðir og þrif á merkingum, hreinsun rusls, viðhald á kössum fyrir uppteknar torfur, tæming ruslatunna, flokkun endurvinnslu og umhirða svæðanna í kringum teigana.

Þeir sem sinna þessum verkefnum eru sannarlega fólkið á bak við tjöldin.

Farfuglar kveðja

Sumarstarfsfólkið okkar hefur vaxið í starfi eftir því sem liðið hefur á sumarið, axlað aukna ábyrgð og sýnt einlægan vilja til að læra. Notkun og umhirða flatarsláttuvéla er krefjandi við venjulegar aðstæður en á yfirborði með litla grasþekju er verkefnið töluvert erfiðara.

Ég vil þakka þessum einstaka hópi kærlega fyrir samstarfið og fyrir að leggja hjarta og sál í að bæta golfvellina.

Í sumarlok kveðjum við þetta samstarfsfólk okkar og förum töluvert fámennari inn í næstu vikur. Framlag þeirra í sumar hefur þó komið okkur í góða stöðu til að sinna viðhaldi vallanna fram á haustið.

Horft fram á veginn

Eftir því sem aðstæður leyfa mun áhersla okkar næsta mánuðinn færast að því að slá háa kargann í kringum báða vellina og safna grasinu saman. Undanfarin sumur höfum við unnið að því, með góðum árangri, að byggja þessi svæði upp með háu, gulleitu grasi.

Sáningu á öllum flötum er nú lokið og næstu vikur verður þeim sinnt með áherslu á að draga úr álagi á grasið og byggja upp seiglu þess fyrir komandi vetur.

Umhverfisviðurkenning og umhirða

GKG fékk nýverið umhverfisviðurkenningu Garðabæjar fyrir vandaða umhirðu lóðar og þess lands sem við berum ábyrgð á. Þessi viðurkenning gleður mig mikið, sérstaklega fyrir hönd garðyrkjumannsins okkar, Gogga.

Margir félagsmenn hafa séð Gogga og teymi hans að störfum í sumar. Ábyrgð þeirra nær langt út fyrir hefðbundið viðhald golfvallar. Þau sinna meðal annars daglegri ruslatínslu, viðhaldi aðkomu, bílastæðis og hellulagðra svæða, klippingu runna og trjáa, gróðursetningu og fegrun við klúbbhúsið og á vellinum, trjáplöntun um allt svæðið og viðhaldi gönguleiða.

Goggi er sjaldan uppiskroppa með hugmyndir að úrbótum og viðurkenningin er til vitnis um árangur þeirrar stefnu sem klúbburinn hefur markað varðandi fegrun nærumhverfis, ábyrgð í umhverfismálum, bætta ásýnd og góð tengsl við nærsamfélagið.

Nýtt áhaldahús

Um þessar mundir sjáum við glitta í verkefni sem hefur verið lengi í undirbúningi og skiptir okkur miklu máli. Hönnun nýs áhaldahúss er lokið og undirbúningur framkvæmda langt kominn.

Starfsemi okkar hefur fyrir löngu vaxið upp úr núverandi aðstöðu og er nú dreifð um átta gáma og gamla húsið á æfingasvæðinu.

Nýja aðstaðan verður staðsett sunnan við bílastæðið og verður miðlægari stöð fyrir rekstur og umhirðu vallanna. Hún mun einnig veita okkur þá innviði sem nútímalegur vallarrekstur og viðhald tækjabúnaðar krefst. Þar verður nægilegt rými fyrir stækkandi flota okkar af rafknúnum tækjum og möguleiki á að geyma vélar innandyra, sem hjálpar til við að vernda búnaðinn og lengja endingartíma hans.

Aðstaðan verður sérhönnuð með þarfir starfseminnar að leiðarljósi og mun bjóða upp á rými fyrir vetrargeymslu vélmenna og hleðslustöðva, aðstöðu fyrir viðhald vökvunarkerfisins, trésmíði og vetrarviðhald vallarbúnaðar, fullbúið vélaverkstæði með lyftibúnaði, geymslu fyrir verkfæri og annan búnað og þurrkaðstöðu, ásamt sérstakri sandgeymslu og þvottaplássi utandyra.

Sameining starfsemi okkar undir einu þaki mun skila aukinni skilvirkni, bættum vinnuaðstæðum og markvissari langtímastýringu tækjabúnaðarins.

Ég vil færa öllum sem stutt hafa verkefnið og barist fyrir framgangi þess innilegar þakkir, sérstaklega Gumma. Þetta er stórt skref fram á við fyrir vallarreksturinn og mun skapa okkur þann grunn sem við þurfum til að halda áfram að þróa völlinn til framtíðar.