Æfingaferð GKG afreksunglinga til Spánar 5.-12. apríl 2010
Líkt og undanfarin ár var farið í æfingaferð til útlanda til að undirbúa afrekskylfinga félagsins fyrir sumarið. Ferðin stóð þeim kylfingum til boða sem eru í afrekshópum unglinga og meistaraflokkum karla og kvenna. Því miður hentaði tímasetningin illa fyrir meistaraflokkskylfingana og fór aðeins einn úr þeirra röðum, en tólf úr unglingahópunum. Að auki voru þjálfararnir Derrick Moore og undirritaður. Fimm foreldrar nýttu tækifærið og slógust með í för. Eins og áður leggur GKG einungis til tíma þjálfarana, en allur kostnaður er greiddur af þátttakendum, og söfnuðu krakkarnir fyrir ferðinni með ýmsum hætti frá því í nóvember. Mæður þriggja þátttakenda, þær Valgerður, Eva og Dröfn sáu um skipulagningu á fjáröflunum og fá þær miklar þakkir fyrir það.
